A su Parcu de Tepilora, de sos territòrios de su Riu Pasada e de su Montarvu l'ant dadu su reconnoschimentu ufitziale. Eris in Parigi, su Consìgiu internatzionale de coordinamentu pro su programa "Mab Unesco" at disinnadu de annànghere su parcu a sas belle 700 reservas de bio-isfera isparghinadas in 120 paisos de su mundu.

Sas bator biddas de su Parcu (Bitzi, Pasada, Lodè e Torpè) aiant fatu sa proposta a àteras noe Comunas (Budune, Alà, Padru, Buddusò, Osidde, Orune, Lùvula, Onanie, Thiniscole). Sa candidadura, duncas, est tzucada cun 13 biddas. Posca ant pedidu de bi pigare parte fintzas Santu Diadoru, Irgoli, Lòcula e Garteddi.

Su presidente de su Parcu, Gratzianu Ispanu, in pare cun sos sìndigos de Pasada, Torpè e Bitzi, nch'aiat imbiadu sa documentatzione a su ministeru de s'Ambiente su 14 de cabudanni de s'annu coladu. Su 30 de su matessi mese, su dossier nch'est cròmpidu a Parigi.

«Est unu reconnoschimentu chi avalorat sa polìtica regionale in contu de ambiente», at naradu s'assessora Donatella Ispanu. Su presidente de su parcu at ammentadu su caminu longu chi at produidu custu resurtu: «Amus pensau a s'idea de su parcu cando in Provìntzia de Nùgoro fiat difìtzile a nde faeddare. Ma amus sighidu su matessi sensibilizende sa gente. Torramus gràtzias a sa Provìntzia, dae cando bi fiat Deriu, e a sa Regione pro s'agiudu».

Su progetu Mab Unesco naschet su 1971 cun sa punna de tzertificare sos logos prus dèghidos a isperimentare sas ideas noas pro s'isvilupu sustenìbile. Su territòriu de su Parcu de Tepilora est sa prima reserva Mab in Sardigna.