Su verbu "segare" aberit oe sas primas pàginas de sos giornales sardos. «Mènguas, finas sa Sardigna narat chi nono» est su tìtulu mannu de La Nuova, chi sighit gasi: «Pesada de sas Regiones contra a sa manovra de su guvernu: in s'ìsula su Cussìgiu dat su stop a Renzi. Sos arriscos: prus tassas e unu sacrifìtziu de àteros 97 milliones. Pigliaru: "Isvantàgios medas"».

Simigiante meda s'abertura de L'Unione sarda: «Mènguas a sas Regiones, est cuntierra». Sighende a lèghere agatamus sas paràulas de su presidente de sa Cunferèntzia de sas Regiones Segio Chiamparino: «Amus a dèvere intervènnere in s'ispesa sanitària o ismanniare sas tassas». Renzi li rispondet: «Totus devent minimare gastos e pretesas». Pigliaru narat chi «cherimus unu cunfrontu abertu cun su Guvernu, no amus tzertesa in pitzu de sas intradas e arriscamus de dèvere renuntziare a sa mèngua de s'Irap».