Sa sanidade in prima pàgina oe in ambos sos giornales sardos. Ma cun duas novas diferentes. L'Unione ponet in evidèntzia sas cuntierras intre sas cumponentes de sa majoria regionale in pitzu de sa mèngua de su nùmeru de sas Asl (dae oto a bator cantas fiant sas provìntzias betzas): «Sanidade, sa gherra de sas Asl. At a èssere s'addòbiu intre sa Giunta e sos partidos, in sas dies chi benint, a isòrvere su primu nodu veru de sa legisladura».
La Nuova Sardegna nde bogat a campu sas cunventziones cun sas istruturas privadas: «Sanidade, allarme trincos pro anàlisi e bìsitas». In Sardigna su disavantzu (su de tres in Itàlia a segus de Làtziu e Campània) sighit a crèschere: «dae sos 400 milliones atuales si diat pòdere arribare a sos 600 intro de s'agabbu de s'annu». Ma sa detziosione regionale naschet finas dae su decretu Monti-Balduzzi chi punnat a una redutzione de sos costos pro custas prestatziones laboratoriales.
L'Unione e La Nuova cumpartzint finas sa nova de su tempus malu chi s'est torradu a fàghere bìdere in sas oras coladas impitende su tèrmine nou “bombas de abba”. Polèmicas a pitzu de sos allarmes arribados a tardu, ma finas a pitzu de sos traballos male fatos.
Pro su chi pertocat s'isport agatamus oe in prima duas foto-notìzias: sa pèrdida de su Cagliari («befadu in Verona») in L'Unione e sas bìnchidas de sa Dinamo e de sa Torres in La Nuova.
La Nuova ponet in prima pàgina (in L'Unione in sa de chimbe) sa manifestatzione de su 13 de nadale chi s'at a tènnere in Casteddu contra a sas tzerachias militares: «O Pigliaru nche càtziat sos militares dae sa Sardigna o ant a èssere sos sardos a catziare a isse dae sa Regione».