Riceviamo e pubblichiamo il saluto dell'artista Diego Asproni all'amico Vittorio Sella.

Custu veranu, su 26 de maju, aio iscritu una paia de pazinas pro presentare su libru suo in Thiniscole, UNA CAMPURA DE VISOS E TRAMPAS.

Chie est Vittoriu Sella? Professore de iscola media, insegnante de italianu e istoria, in Thiniscole. Istudiosu de istoria, istudiosu de documentos de istoria de sas biddas nostras, Iscrittore de libros chi contan sa rebellìa de sa tzente nostra, contra a sa prepotentzia. Giornalista de S'unione Sarda pro tantos annos, istudente in Cagliari in sa facultate de Istoria e Filosofia, Laureatu in custa materia. Militante de su Partitu Comunista, pro tantos annos, a sos tempos de Enrico Berlinguer. De ideales sardistas, de libertate e de giustitzia sotziale. Unu iscrittore de parte, chi at semper isseperatu a cale ala istare. Unu iscrittore partigianu, mi permitto de narrer.

De goi cumintzaio s'arrejonu meu, pro su libru suo. Ma isse s'est irmalaidatu e sa presentada de s'urtima opera sua, organizzata dae sos amicos de Thiniscole non s'est fatta. Sa malattia at fattu su caminu suo, e s'amicu nostru, oje no est prus. Jeo l'ammento inoche, in custa bidda chi cheriat bene, comente bidda sua. Bidda uve at travagliatu e s'est cojuatu. Uve, paris chin Franca sa mutzere, at pesatu sos duos fizos, Anna Laura e Enrico Comente tantos de Thiniscole. Lu connoschio bene. E l'istimaìo. Travagliaìat chin impegnu. Ischiat tratare chin sos pitzinnos. Connoschiat sas maneras bonas pro los fachere creschere. Pro isse, sos pitzinnos fin totu uguales, e totu aian su matessi diritu de imparare. Totu sas letziones fin bellas. Ma sas chi sentiat de prus chin su coro, fin sas letziones de istoria. Sa passione sua. Cando deviat ispiegare unu tempus istoricu fit semplice e craru. Condo contaiat de sas zovanos mandatos in gherra e de sos campos de concentramentu, sa commotzione fit prus forte de isse.

Fit unu istudiosu. Unu chi ischiat chircare sos documentos in sos archivios. Li piaghiat a travagliare leghende sos documentos iscrittos. Bi l'aiat imparatu unu professore de istoria meta connotu: Padre Rimundu Turtas, professore chi istimaiat meta. Leghende in sos archivios aiat collitu totu s'anneu de sos thiniscolesos. Totu s'amargura de su 1906. Totu sa povertate de cussos annos. Cando sa bidda de Thiniscole s'est irvortata contra a s'ingiustitzia. Isse l'at contatu cussu contu. Che cando chi esseret istatu fizu de custa terra. Custa fit sa manera de cherrer bene a sa bidda de Thiniscole. Sa manera sua de cherrer bene a sa Sardigna intrea.

Cando istaiat in Bitzi, cata die iscriat pro su giornale. Sos iscrittos suos in s'Unione Sarda, contaian de su chi capitaiat in bidda. Ma su chi contaiat de prus fit de su travagliu in sa frabica tessile fraicata nova-nova, in su 1976. E cando sa frabica, in su 1978 at licentziatu sas 180 operaias, Vittoriu, pro annos, at contatu s'agonìa intrea de chie aiat perditu su travagliu.

So andatu a l'acatare a s'ispidale, deche dies in antis de morrer. L'aìo picatu su giornale. At cherfitu chi l'aère acurtziatu su letu a sa ventana, pro leghere mentzus. Cheriat ischire de mene. Jeo li contaìo de s'ativitate culturale in bidda nostra. Isse fit meta cuntentu de custu. Cheriat ischire meta. E m'at cumintzatu a contare de sa die chi sa bidda nostra, s'est irvortata in su 1969, ca non b'aiat travagliu. Isse tando fit istudente e si fit ghettatu a aiuare sa bidda. E m'at contatu de comente los aian totu dennuntziatos, e in trintaduos los aian processatos, e cundennatos in pretura, pro cussa rebellìa.

M'ammento de cando una die l'apo telefonatu a s'ispidale. Li naraìo chi ipo interessatu a ischire de unu senatore bitzichesu de s'800. Isse mi cussitzaiat sos libros chi devio leghere. E sa die a pustis, at acatatu su tempus de mi cramare a su telefono pro mi dettare sos titulosde sos libros uve potìo acatare su chi ipo chircande. Potìo narrer ateru, ma apo isseperatu custu ammentu. E nois amus apitu una perdita. Sa famiglia at apitu una perdita.

Sa Sardigna at perditu un'amicu e un'istudiosu. Bitzi 24/11/2018 Diegu Asproni