Fìamus abarrados a sa data de su 2 de martzu. Ma su guvernadore Cappellacci (chi at a èssere su candidadu ufitziale de su tzentru-destra) cun su decretu de eris at decraradu chi s'at a votare su 16 de freàrgiu, antitzipende de duas chidas su disafiu eletorale. Como sos partidos cheret chi si movant a depositare sos sìmbulos intro de bator dies dae sa data de publicatzione de su decretu in su Buras (duncas, dae cras) e presentare sas listas intro de 13.
Cun sas iscadèntzias chi s'acùrtziant su tzentru-manca devet detzidere in presse subra sa possibilidade chi siat o non siat Frantzisca Barracciu a ghiare sa coalitzione. Sa candidada at naradu oe a sa diretzione regionale de su Pd chi «cun megus si podet bìnchere». Diretzione agiornada a cras. Ma sighit sa contrariedade de Sel (Micheli Piras, pro su chi pertocat su 16 de freàrgiu, faeddat de «golpe»). In s'interi 22 giòvanos ant iscritu una litèra contra a sos indagados candidados («fatzant unu passu in segus pro su bene de sa coalitzione»). Si sa candidada no at èssere issa su Pd nde devet seberare un'àteru luego. Si at a èssere issa at a tocare a Sel, paris cun àteros (Irs, Rossomori, Sardigna lìbera), a fraigare una coalitzione alternativa in giru de pagas dies.
Tempos curtzos pro chie oe no at rapresentantes in cussìgiu e chi, duncas, devet collire sas firmas netzessàrias: a comintzare dae su Movimento 5 stelle chi cuncurret a sas regionales pro sa prima bia. Ma finas pro Sardegna possibile chi in s'interi at fatu connòschere 6 assessores s'in casu sa coalitzione ghiada dae Michela Murgia bincat sas eletziones (s'iscritora de Cabras no at a pigare in cussìgiu si Sardegna possibile no at a resurtare intre sas primas duas coalitziones).
Su Fronte indipendentista unidu, chi eris at manifestadu in Terranoa pro sa soberania alimentare e contra a s'intrada de alimentos istràngios sena controllu faeddat de «golpe contra a s'indipendentismu chi creschet, ma – comente nos at naradu Predu Frantziscu Devias - amus a collire sas firmas pro nos presentare in totue». Pro Devias sa lege eletorale «s'annanghet a s'embargu mediàticu postu in òpera contra a su Fronte».