Bonas dies e bonu comintzu de chida.

No agabbant sas contradditziones in su Pd. Si sa detzisione de Soru (sa de si pònnere a dispositzione pro ghiare su partidu sardu) aiat postu in mala muta unos cantos dirigentes, como est su Pranu paesagìsticu suo a fàghere chistionare. Essidu torra a campu a segus de sa burrada de su Pps de Cappellacci, est como ogetu de unos cantos meledos de Francesca Barràciu, giai segretària de su Pd e europarlamentare che a Soru, guvernadora fartada e como sutasegretària ministeriale a sos benes culturales: «Su pranu paesagìsticu chertu dae Renato Soru in su 2006 fiat “manicheu”. Como serbit una revisione pro evitare chi sos vìnculos tèteros meda potzant impeigare sa vocatzione turìstica e agrìcula de sa Sardigna».

La Nuova seberat de abèrrere oe cun sa crònaca: «Fertu cun chimbe istocadas dae unu 16enne». «Nùgoro – sighit -, giòvanu de 20 annos agredidu dae su minorenne pro more de unu saludu no agradèssidu a probe de unu locale. Est grave. S'assalidore, recuidu a domo, firmadu dae sa Politzia: est acusadu de punna de delitu».

Crònaca armada finas in sa nova bonolvesa: «Paschìngiu cuntierradu a segus de sa “marrania” a corfos de rustàlliu».

In subra sa nova de sa Dinamo chi at bìnchidu su primu disafiu de su campionadu de sèrie A de bàschet: «Dinamo, bona sa prima. Bologna a terra».

A maduru sa foto de sa tzerimònia religiosa isetada dae sos tataresos: «In 10mìgia pro su Biadu Ziranu».