PASADA. Sighint sos addòbios ordingiados dae su “Sòtziu Tenores Sardigna” e patrotzinados dae sa Regione pro “Sa Die de sa Sardigna”. A pustis de su de Tiesi, oe amus a àere su segundu in Pasada cun sa collaboratzione de sa Pro Loco e de su “Tenore Sas Murtas” e cun s'agiudu de s'amministratzione comunale.

A sas 11 de mangianu, in s'iscola mèdia s'at a tènnere su “Laboratòriu” pro fàghere a bìdere a sos dischentes comente si cantat e pro lis fàghere cumprendere su ligàmene intre su cantu e sa cultura sarda.

A borta de die, a sas 5,30 in “Sa domo de sas damas” at a comintzare sa cunferèntzia "Cantende pro sos istranzos - Tenore, limba sarda e turismu, un'aboju possìbile" cun Tore Tedde, espertu de poesia sarda e de cantu a tenore, e Bustianu Pilosu, maistru in su Cunservatòriu de Casteddu. Sa cunferèntzia at a èssere aberta dae sos saludos de su Sìndigu Roberto Tola, dae su vitze presidente de sa Pro Loco Ànzelu Canu, e dae su presidente de su “Sòtziu” Sarvadore Ghisu.

S'at a sighire cun sos càntigos de su “Tenore Nunnale" de Orune, de su “Tenore Santa Nostasia” de Buddusò, de su “Tenore Santu Larettu” de Silanos, de su “Cuntzertu Abbasantesu”, de su “Tenore Sas Murtas” de Pasada e de su “Tenore de Pasada”.